Araka ny fampitam-baovaon’ny eo anivon’ny Ceni, teny Alarobia, omaly, nofaranan’ny komity mpitantana tamin’ny fivoriana fahenina ny tetikasa Fanamafisana ny fizotran’ny fifidianana sy ny demokrasia eto Madagasikara (RPedem) iarahana amin’ireo mpiara-miombon’antoka, afakomaly. Nanatrika izany ny filohan’ny Ceni, Rakotonarivo Thierry. Teo koa ny mpandrindra maharitra ny Firenena mikambana (ONU) monina sy miasa eto Madagasikara, i Ngororano Anthony; ny solontena maharitry ny Fandaharanasan’ny Firenena mikambana ho an’ny fampandrosoana (Pnud), i Edward Christow. Nanampy ireo ny ambasadaoron’i Japon, i Tojima Hitoshi sy ny solontena manokana sy tomponandraikitra voalohan’ny Vondrona afrikanina eto Madagasikara, i Dibi Bongro Zephirin, ary ireo solontenan’ny mpiara-miombon’antoka ara-teknika sy ara-bola. Vinan’ny tetikasa ny hanorenana ny fifanarahana ara-piarahamonina sy ny hanomezan-danja ny safidin’ny tsirairay ary ny hahazoan’ny rafi-pifidianana maneho amim-pahamarinana sy amim-pilaminana ny safidy sy ny fahefana ananan’ny vahoaka. Nahatratra 13 tapitrisa dolara mahery ny tetibola tamin’ny fifidianana filohan’ny Repoblika 2023 sy depiote mey 2024 ary ny ben’ny Tanàna desambra 2025.
Amin’izao, hiatrika fifidianana indray i Madagasikara. Hanao ahoana? Araka ny tsilian-tsofina voaray, tsy mifarana ny fiaraha-miombon’antoka iraisam-pirenena ho an’ny fizotram-pifidianana eto Madagasikara. Misy tetikasa Fanohanana ny fizotry ny fifidianana ho an’ny famerenana ny fanorenana indray an’i Madagasikara na ny Appui au processus électoral pour la refondation de Madagascar (Aperm). Efa an-dalana amin’ny fanatanterahana azy izany amin’izao.
R. Nd.
French