Hametraka politika nasionaly vaovao momba ny fampiasambolam-panjakana ny Governemanta. Tanjona ny hanana vina maharitra sy vokatra mivaingana ho an’ny fampandrosoana ny firenena.
Hiara-hiasa ny Primatiora, ny Oniversiten’ Antananarivo, ny Imatep ary ny Enam hanamafy ny fandrafetana ny politika nasionaly momba ny fampiasambolam-panjakana. Nanao sonia izany teny amin’ny Lapan’i Mahazoarivo, omaly, ireo mpisehatra voalaza. Tanjona ny hananana politika mifototra amina vina maharitra sy matanjaka izay hipaka mivantana amin’ ny fiainan’ny mponina sy ny toekarena. Voafaritra ao anatin’ny fiaraha-miasa ny hampihena ny elanelana misy eo amin’ny famatsiam-bola sy ny vokatra andrasana. Kendrena ny hamaliana haingana ny filan’ny mponina amin’ny alalan’ireo tetikasa samihafa sy hanohanana ny fampandrosoana ny toekarena. Omena lanja ao anatin’izao dingana izao ny fahaiza-manao eto an-toerana sy ny anjara toeran’ny manam-pahaizana sy ny tanora, indrindra amin’ny alalan’ny fiaraha-miasa amin’ireo ivontoeram-pampianarana ambony. Kendrena ny hampifandray ny tontolon’ny fikarohana sy ny fampianarana amin’ny filan’ny sehatry ny asa sy ny fampandrosoana.
Ho an’ny rehetra
Misokatra ho an’ny sehatra tsy miankina, ny fiarahamonim-pirenena, ireo mpiara-miombon’antoka amin’ny fampandrosoana, ny vondrona mpikaroka ary ireo manam-pahaizana eto an-toerana sy any ivelany ny fandraisana anjara. Miantso ireo manana traikefa, fahaiza-manao na tolo-kevitra azo hampiharina mba handray anjara amin’ny famolavolana ny politika nasionaly ny fanjakana. Nanomboka omaly ka haharitra iray volana, hatramin’ny 9 oktobra, ny fisoratana anarana. Hatao ny 19 oktobra hatramin’ny 18 desambra kosa ny fifanakalozana ara-teknika amin’ireo lohahevitra samihafa. Dingana lehibe hanatsarana ny fitantanambolam-panjakana ny tetikasa hapetraka. Tanjona ny hamadihana azy ho vokatra, hanohana ny asa sy ny toekarena ary hitondra tombontsoa maharitra ho an’ ny mponina.
Henintsoa
French