«Miomana hatrany! » Hiatrika lalao fitsapana amin’ny ekipa voafantin’i Moramanga, ny alahady ho avy izao, any an-toerana, ny ekipam-pirenena Barea, sokajy U23. Fihaonana tafiditra amin’ny fanomanana ny fifanintsanana Can U23 2027. Marihina fa ny voalohan’ny volana novambra ho avy izao no hihaona amin’i Afrika Atsimo i Madagasikara, mandritra ny dingana faharoa. Mpilalao miisa 27 no mandrafitra ny ekipam-pirenena. Misy amin’izy ireo no efa niatrika ny fifaninanana afrikanina. Ao anatin’izany i Cristiano sy Tahina, lohalaharan’ny CFFA, tompondakan’i Madagasikara. Tazana ao ihany koa ry Ismael sy Pito, mpilalaon’ny FC Rouge.
Araka ny filazan’ny loharanom-baovao iray, misy mpilaravinahitra hafarana rehefa akaiky ny fotoana hikatrohana amin-dry zareo Afrikanina Tatsimo, anisan’izany i Massy, lohalaharana ao Seychelles. Hisy koa ireo avy any Eoropa saingy tsy mbola voafaritra mazava ny anarany. Ampahafantarina fa efa tonga nijery sy nanara-maso ny fizotry ny fanazarantena tao Mahamasina, omaly, ireo teknisianina roa dia i Boualem Mankour, alzerianina sy i Johan Paul, kapitenin’ny Barea teo aloha.
Fitia Randria
French