Mamaha ny olan’ny tsy fandriampahalemana ny fisian’ny jiro manazava ny arabe sy ny
elakelantrano. Tafiditra ao anatin’ny velirano 2, hisian’ny « Hazavana ho an’ny rehetra » ihany koa.
Mitohy ny tetikasa «Hazavao ny elakela-trano». Natomboky ny minisitry ny Angovo sy ny akoranafo (MEH), Andriamanampisoa Solo teny Andohanimandroseza, boriborintany faharoa eto an-dRenivohitra, ny herinandro lasa teo ny fizarana jiro «Cobra», manazava ny arabe sy ny elakela-trano. Notohizany tany an-tampon-tanànan’i Mahanoro, izany ny zoma 3 marsa teo, ho an’ny faritra Atsinanana.
Miisa 110 ny jiro «cobra» napetraka tao amin’ny fokontany efatra any Mahanoro. Natao isaky ny 50 metatra ny elanelana amin’ny lalana mitotaly 5 km, manaraka ny arabe sy ny elakela-trano. Nilaza ny minisitra Andriamanampisoa Solo, fa hamaha ny olan’ny tsy fandriampahalemana eny amin’ny fokontany sy ny lalankely, sady hampisitrahana hazavana ho an’ny rehetra, araka ny velirano 2 napetraky ny filohan’ny Repoblika. Ho afaka mivezivezy mifety amin’ny harivariva ihany koa ny mponina ».
Ho hentitra manaloana ny mpangalatra
Nanotrona ny minisitra Andriamanampisoa Solo tamin’ity fotoana ity ny tompon’andraitry ny vondrom- bahoaka itsinjaram-pahefana eny ifotony notarihin’ny governoram-paritra Atsinanana.
Faly ny mponina tamin’izao hetsika izao. Nitsotra ny ray aman-dreny lehibe iray, fa tsy mba nisy mihitsy ny jiro manazava ny elakela-trano sy ny lalam-pasika hatramin’izay. Nanentana ny mpiara-monina kosa ny lehilahy iray, ho hentitra ny fanaraha-maso ireo minia mangalatra ny fotodrafitrasa ho an’ny daholobe toy izao.
Ho entina hahatsiarovana ny andron’ny vehivavy, ny 8 marsa ho avy izao, natolotry ny minisitra ny fikambanam-behivavy ny fanomezana, lambahoany miisa 20, tamin’ny anaran’ny fitondram-panjakana.
Njaka Andriantefiarinesy
French