“Efa nankalaza ny Andro ho an’ny zon’ny vehivavy isika tamin’ny 8 marsa, niraisan’ny firenen-drehetra. Noho ny fisian’izao voina lehibe misy eto amin’ny firenena izao, maro ireo namoy ny ainy sy ny traboina: ajanona aloha ny fankalazana, ankoatra izay efa natao tamin’ny andron’ny 8 marsa.”
Io no fanazavan’ny minisitry ny Atitany sy ny fitsinjaram-pahefana, i Tokely Justin, tamin’ny mpanao gazety, teny Anosy, ny faran’ny herinandro teo. Tsy azo nialana ny tamin’ny 8 marsa, fa andro natokana ho an’ny zon’ny vehivavy manerana an’izao tontolo izao. Tao anatin’izany ny teto Madagasikara.
Ankoatra ny 8 marsa efa vita, hajanona ny fankalazana. “Mba marika iray hampisehoantsika fa miray hina isika amin’ireo havantsika namoy aina sy amin’ireo traboina marobe izany amin’ ireo faritra isian’ny fiakaran’ny rano sy traboina marobe”, hoy izy. Noho ny fihavanana, tokony hampiseho firaisankina sy fiaraha-miory ny vahoaka malagasy amin’ny faritra 23 manerana ny Nosy amin’ireo havana namoy aina sy traboina amin’izao fotoana izao izay tena sahirana. “Hanao izay vitantsika isika”., hoy ihany izy.
R. Nd.
French