Mampihoron-koditra ny zava-misy ao Toamasiana. Tsy mbola nisy hatrizay ny fijoroan’ izany fikambanan-jatovo maditra na Fikambanana Liandra Mahery(FLM) izany.
Mihorohoro izaitsizy indray ny mponina ao Mangarivotra Toamasina nanomboka ny zoma, ny sabotsy nitohy hatramin’ny alahady teo. Olona telo no efa naratra mafy tao anatin’izay telo andro izay noho ny fisian’ireo andian-jatovo (ahitana vehivavy) mirongo zava-maranitra sy hazo ka midaroka sy manindrona avy hatrany ny olona mifanena aminy (fahafinaretan’izy ireo mihitsy ny manao izany, raha ny fampitam-baovao voaray avy any an-toerana). Tsy mandroba na manendaka anefa ry zareo fa mandratra fotsiny ary sahy miantsoantso mihitsy hoe “mivoaha izay sahy”, araka ny fanazavan’olon-tsotra iray nitantara ny fanaon’ny andian-jatovo mpampihorohoro. Ny sabotsy teo no fantatra fa betsaka kokoa izy ireo ary nisy niantso zandary sy polisy saingy tsy hita tampoka ny nanjavonany nony tonga ny mpitandro filaminana. Toy ireny andian-jatovo mahery setra “Foroches” tany Antsiranana ireny ny fanaovan’ny andian-jatovo ao Toamasina azy, araka ny fanazavan’ny mpitsara iray monina ao Mangarivotra, raha nanatri-maso ny fanaon’ny andian-jatovo mpampihorohoro. Nohamafisin’ny loharanom-baovao iray fa efa namono nahafaty olona tao Toamasina ny andian-jatovo mahery fihetsika mitonona anarana hoe FLM (Fikambanana Liandra Mahery).
Nampitandrina ny polisy…
Nisy paikady sy lamina manokana napetraky ny polisy ao Toamasina amin’ny fanaraha-maso ny andian-jatovo mahery setra. “Efa misy ny paikady manokana napetraky ny polisy amin’ny alalan’ny fametrahana ireo polisy manao fanamiana sivily manara-maso ny andiana tanora amin’ny faritra tena anaovan’izy ireo ny asa ratsy”, hoy ny fanazavan’ny Talem-paritry ny filaminana anatiny amin’ny faritra Atsinanana, ny kaomisera Rakotovao Jean Christian. Nohamafisin’ny kaomandin’ny polisin’ny Fip Toamasina, ny Kaomisera Rafaliarivo Jules izany sady nampitandrina izy. Tsara ny manamarina fa tsy misy idirany amin’ny anaram-pinoana iray misy eto amin’ny firenena ny anaran’ity fikambanan-jiolahy ity.
Raim-pianakaviana iray maty voatsatoka antsy…
Ny alahady alina teo, nampiseho ny herisetra toy ny fanaony ireo andian-jatovo. Raim-pianakaviana iray namonjy lanonam-pianakaviana, tsingerintaona nahaterahan’ny rahalahiny, tao Antanandava no naratra mafy voatsatok’antsy. Teny an-dalana hamonjy fodiana izy no nifanehatra tamin’ny mpisetrasetra ka naratra mafy. Tsy nisy zavatra very na nalain’izy ireo anefa tany aminy. Lasa nitsoaka avy hatrany izy ireo rehefa avy nanindrona antsy azy. Namoy ny ainy kosa ilay niharam-boina noho ny ratra mafy nahazo azy.
Sajo/Jean Claude
French