Niakatra fampanoavana omaly, notanana am-ponja vonjimaika miandry ny
didim-pitsarana azy ny lehilahy iray. Voatondro ho nandroba mpivady efa samy misotra ronono, tetsy Ampandrana izy. Niditra an-keriny tao amin’ny tokantrano iray. Nandroba vola mitetina 4 hetsy, ny alahady 12 marsa lasa teo.
“Sendra nivoaka hifoaka sigara teto an-tokontany aho ny maraina. Nisy olona nipoitra tampoka ka nibata ary nanatontona ahy tamin’ny rindrina”, hoy ilay lehilahy lehibe lasibatra. “Poa toy izay, nihazakazaka niditra tao an-trano io mpangalatra io ary nitondra antsy. Niditra tao amin’ny efitra fatorian’ireo mpivady avy hatrany. Mbola teo am-pandriana ny vadiko no nambanany antsy ary nokasainy ho kendaina”, hoy hatrany ny lasibatra.
Tetsy ankilany, nahatsiaro tena, niezaka nihazakazaka hamonjy ny vadiny ity rangahy ity. Tsy nampoizin’io mpangalatra io, arak’izany, ny fahatongavan’ilay rangahy tao aoriana. “Nangataka azy aho tsy hamono anay fa hanome izay tadiaviny”, hoy ity lehilahy lehibe. Lasany ny ambin’ny fisotron-drononon’izy mivady. Mitentina 4 hetsy mahery eo io vola io. Nivoaka moramora ny trano ilay jiolahy. Niantso ny mpitandro filaminana ireo lasibatra. Voasambotra ny lehilahy iray ka izao niafara amin’ny fihazonana azy am-ponja izao.
Tsiferana R.
French