Tontosa ny fandraisana ny sary sy ny feo. Tafavoaka ny DVD renihira an’ny tarika Dadalora Manalalondo. «Ito ny vokatra voalohany DVD renihira navoakanay ho an’ity andrarezin’ny hiragasy ity. Goavana be ny tarika Dadalora Manalalondo eo amin’ny hiragasy. Lehibe tahaka izany koa ity DVD renihira ity satria fitaovana anisan’ny tsara no nandraisana ny feo sy ny sary. Sady fanajana ny mpanjifa izay mitady kalitao tsara hatrany rahateo izany no fanomezana lanja ny hiragasy», hoy Dadafara tompon’andraikitra voalohany ao amin’ny trano mpamokatra LT Production. «Aza sodokan’ny nahatongavana fa jereo ihany ny hiaingana». Io ny lohatenin’ny renihira voarakitra ao anatin’ity rakitsary vaovao ity.
Notsiahivin’i Dadafara hatrany ny maha zava-dehibe ny hiragasy eo amin’ny fitaizana sy ny fanabeazana ny taranaka. «Ao anatin’ireny hiragasy na renihira ireny no hisintonana anatra hoenti-manitsy ny dia, na mandray lesona hoenti-miatrika ny hoavy», hoy izy.
HaRy Razafindrakoto
French