Nitsangana ny 31 marsa 2013 ny haino aman-jery KoloTV/FM. Feno 10 taona katroka ary nanamarika izany tetsy Antanimena, ny zoma hariva teo.
Haino aman-jery efa nandalo fotoan-tsarotra sy sedra ny Kolo TV/FM sy ny Kprod. Anisan’ izany ny fanakatonana azy saingy mbola izao nahatratra ny faha-10 taonany izao ary mbola mikendry ny handeha lavitra kokoa, miaraka amin’ny fahaiza-manao sy ny fivoaran’ny teknolojia ary ny fiofanana, araka ny lahateny nifandimbiasana. Nambaran’ny tale jeneraly, Andriantsarafara Mija fa nanana tetikasa izy ireo tany am-piandohana ary nanana fahasahiana tao anatin’ny fotoana tsy nilamina ny hanitarana any amin’ny faritra ity haino aman-jery ity. “Tanteraka izany izao amin’ireo fandaharana arahan’ny maro isanandro, any anaty fiara sy any am-piasana hatrany ambanivohitra rehetra any. Hatrany ivelany noho ny teknolojia”, hoy izy. Nampanantena ny tenany fa vonona hatrany hanome ny tsara amin’ireo fandaharana samihafa, mendrika ny mpijery sy ny mpihaino .
Kolo…Kolontsaina malagasy
Nampahatsiahy ny anton’ ny anarana Kolo kosa ny filoha tale jeneraly, Andrianainarivelo Hajo ka nambarany fa nosafidiana izany ho fampiroboroboana ny kolontsaina malagasy sy ny fanasongadinana ny vokatra eto an-toerana.
“Eo koa ny fanomezana sehatra ireo tanora amin’ny hamaroan’izy ireo mampihodina ny KoloTV/FM hatrany amin’ny faritra. Efa fanamby rahateo izany”, hoy izy. Nanteriny fa natao ahafantarana kokoa ny kolontsain’ny faritra ny fanitarana natao. Nambarany koa fa anisan’ny sekolin’ ny haino aman-jery ity orinasan-tserasera ity ka nanofana tanora ary efa maro ireo nisitraka izany ankoatra ireo mbola ho avy.
Tsiahivina fa nankasitrahana tamin’io fotoana io ireo mpiara-miasa amin’ny Kolo TV/FM sy ireo mpiasa miisa valo mianadahy nahatratra 10 taona, ka nosalorana medaly.
Synèse R.
French