Nihaona tamin’ny minisitry ny Fampianarana ambony sy ny fikarohana ara-tsiansa, Assoumacou Beatrice, ny alakamisy teo, ny fikambanan’ireo mpampianatra mpikaroka (ACE). Nisongadina tamin’izany ny fananganana vovonana manokana hiandraikitra ny andrimaso ho an’ny tontolon’ny siansa sy ny fampandrosoana.
Tanjona ny hahafahana manara-maso ny voka-pikarohana sy ny fanehoan-kevitra ho fampandrosoana haingana an’i Madagasikara. Manana manam-pahaizana mpanao fikarohana maro i Madagasikara ka tokony ho fanoitra ho an’ny fampandrosoana izy ireo.
Hamafisina ny fomba fiasa amin’ny alalan’ny fifanakalozam-baovao sy ny fihaonana matetika eo amin’ny roa tonta. Kendrena ny hisian’ny fitohizan-draharaha sy fiaraha-mikatsaka ny famahana ny olana miseho.
Marihina fa mijoro ihany koa ny birao vaovaon’ny fikambanan’ny mpikaroka (ACE), ary nametraka vina izy ireo ny amin’ny maha mpikaroka loharanon’ny fahalalana, ny fahaiza-manao ary ny fahaiza-miaina, ho fampandrosoana an’i Madagasikara.
Tanjon’ny birao vaovao ny fifanomezan-tanana sy fifanohanana amin’ny fanapariahana ny voka-pikarohana izay iarahany amin’ny minisiteran’ny Fampianarana ambony sy ny fikarohana ara-tsiansa.
Tatiana A
French