Noho ny fahavitan’ny “Ramadan”, nanampy ireo fianakaviana sahirana eto an-drenivohitra
ny fikambanana Miozolimanina Ahmadiyya…
Toy ny fanao isan-taona, mandritra ny volana Ramadan, mifady hanina sy mifady fisotroana ihany koa ny fikambanana Miozolimanina Ahmadiyya mba hahatanteraka ny fifalian’Andriamanitra, araka ny efa voalazan’ny Mpaminany Masina Mohammad. “Rehefa mifady hanina dia noana sy mangetaheta mandritra ny andro manontolo izahay. Mandalo fahasahiranana toy ny iainan’ny mpiara-belona aminay izay sahirana tsy mahita sakafo sahaza azy mandritra ny taona”, hoy ny fanazavan’ny filoha sady misionera mpitarika ny fikambanana Miozolimanina Ahmadiyya eto Madagasikara, Ahmad Mujeeb, nandritra ny famaranana ny Ramadan, omaly.
Izany no mahatonga ny Miozolimanina hanampy ireo mpiara-belona aminy, indrindra ireo vahoaka sahirana mandritra ny volana Ramadan, araka ny fanazavan’ity misionera ity hatrany. “Amin’ny alalan’ny fiantrana sy fizarana sakafo ho an’ny mpiara-belona sahirana alohan’ny fetin’ny Eid-ul-Fitr izao atao izao”, hoy izy. Nisy, araka izany, ny fanampiana nataon’ny Ahmadiyya ireo vahoaka sahirana eto an-drenivohitra, omaly. Nohamafisin’izy ireo fa tsy misy fanavahana ara-pivavahana na ara-pinoana na ara-bolonkoditra izany, araka ny teny fanevan’ny fikambanana hoe : “Fitiavana ho an’ny rehetra, tsy misy fankahalana na iza na iza”. Fianakaviana 400 eto an-drenivohitra ireo nahazo fiahiana ireo. Tsy teto an-drenivohitra ihany fa nahazo tohana toy izao koa ireo tany amin’ny faritra toy ny ao Fianarantsoa, Manakara, Toliara.
Jean Claude
French