Nanjakan’ny klioba Karate Kokaju, Analamanga, ny fiadiana ny amboaran’ny “Coupe Hanshi René Ramanitrandrasana”. Nandrombaka medaly volamena miisa 7 sy alimo 6 ny klioba, nandritra ny fihaonana natao teny Ambatobe, ny sabotsy lasa teo. Notolorana lelavola, 100. 000 Ar, miampy amboara avokoa ireo tompondaka isan-tsokajy. 50.000 Ar ny faharoa. Afa-po ny mpikarakara, tonga avokoa ny klioba nasaina, toy ny Tigers sy Akka, ary ireo solontena avy any amin’ny faritra. Nahatonga solontena ny avy any Vakinankaratra, izay nahazo ny tompondaka lefitra tamin’ny alalan’i Tojosoa.
Araka ny fanambarana nataon’ny Sensei Rakotonirina Marcel, filohan’ny kaomisionina mpikarakara ny fifaninanana, natao hampivoarana ny Karate eto Madagasikara ny lalao.
“Tonga marobe ireo mpandray anjara. Hita fa betsaka ny ankizy sy tanora liana amin’ny taranja karate. Velombolo tanteraka izahay mpikarakara.” hoy Sensei Rakotobe Charlie, vaomiera teknika ho an’ny faritra Analamanga.
Anisan’ny nahafahana nahatontosa ny hetsika rehetra, nandritra ny fahatongavan’i Hanshi Ramanitrandrasana René, ny filoha tale jeneralin’ny Redland, Ylias Akbaraly.
Fitia
(Mpianatra asa)
French