Tsy nahomby ny fikasan-dratsin’ireto jiolahy nanao fakana an-keriny teny Andranonahoatra Itaosy, afakomaly. Olona roa indray tratra (vehivavy sy lehilahy) raha mbola eo am-pikarohana ny roa lahy hafa kosa ny zandary. Mpiasa tao an-tranon’ny ray aman-drenin’ilay nalaina an-keriny ihany ireto nahavanon-doza ireto. Araka ny fampitam-baovao avy amin’ny kaomandin’ ny borigadin’Itaosy, amin’ny maha mpiara-monina, fantatr’izy telo lahy ireo fa misakaiza amina olona manam-bola ity zanaky ny mpampiasa azy. Mahafantatra tsiambaratelo maro mahakasika izany ry zalahy ireto. Vehivavy iray nitonona ho “cousine” no niantso ilay niharam-boina ka nilaza fa te hihaona aminy. Vehivavy iray hafa milaza iraka haka azy teo Andranonahoatra. Notazonin’izy ireo tao amina trano iray eny Vinany Itaosy ilay zanaky ny mpampiasa azy. Tsy vitan’izay fa mbola notampenana ny maso, nofatorana ny vavany sy ny tanana aman-tongony. Vao mangiran-dratsy anefa, nobabena ka naverina teo amin’ny sampanana Vinany izy ary navotsotra sy nafaran’ireo jiolahy hitondra ilay olon-tiany any amin’ny PK-22 Imerintsiatosika. Nilaza ireo jiolahy nandritra ny famotoran’ny zandary fa nikasa haka vola amin’io sakaizan’io izy ireo ka antony nanosika izao fakana an-keriny izao. Nanomboka teo ny fanadihadian’ny zandary ka noraisim-potsiny izy ireo ary samy niaiky ny heloka vitany.
Jean Claude
French