“Taninketsan’ny fanatanjahantena avo lenta ny taranja fanatanjahantena any an-dakilasy ka tsy tokony hatao ambanin-javatra”, hoy ny mpampianatra fanatanjahantena eny amin’ny lycée Nanisana, Randrianarivo Falimanana Jacobson, omaly, teny Alarobia.
Taranja iray ampianarina any an-tsekoly saingy tsy ampy ny fotodrafitrasa sy ny mpampianatra ary ny fiofanana azon’ny mpanabe. “Manangana sekoly manara-penitra maro ny fitondrana amin’izao fotoana izao. Tokony hampiarahiny amin’ izy ireny ny kianja ahazoan’ ny mpianatra manao fanatanjahantena mandritra ny taom-pianarana”, hoy ity mpanabe ity. “Mamolavola ankizy satria fitaovana iray hampitana fahalalana. Ahafahan’ny mpianatra manana toe-tsaina tia mifaninana, mifanampy amin’ny hafa, ahazoany fahatokisan-tena ny fanatanjahantena”, hoy hatrany izy.
Taorian’ny fanadihadiana natao teny ifotony, mahatsapa ny mpampianatra taranja fanatanjahantena fa tokony hatao taranja tsy maintsy atrehin’ny mpiadina rehetra amin’ny fanadinana BEPC izany. “Mampivoatra ny ankizy ara-batana sy ara-tsaina ary ara-pihetseham-po ny fanaovany fanatanjahantena ary mitarika azy ireo hanaja ny fitsipi-pifehezana amin’ny zavatra ataony rehetra”, hoy ny fanazavany ihany.
Manao antso amin’ny tomponandraikitra izy ireo, araka izany, hijery ny tolo-keviny. Misy fiantraikany amin’ny lentan’ny fanatanjahantena ao anatin’ny firenena iray ny firoboroboan’ny fanatanjahantena an-tsekoly.
“Mampalahelo ny mahita fa tsy manana mpampianatra nahazo fiofanana momba ny fanatanjahantena ny ankamaroan’ny sekoly tsy miankina eto amintsika satria tsy omena ny lanja sahaza azy ilay taranja”, araka ny fanehoan-kevitr’ity mpampianatra ity.
Vonjy
French