Rugby vehivavy – « Can 2023 » : nankahery ireo Makis Ladies ireo minisitra Coach

Herinandro mialoha ny hiatrehana ny fiadiana ny ho tompondakan’i Afrika, taranja rugby vehivavy, lalaovina olona 15 (Can 2023), anio. Mialoha izany, tonga nijery ny fotodrafitrasa sy nankahery ireo Makis ladies ireo minisitra mpiahy.

Tonga teny amin’ny kianja Makis Andoha­tapenaka, omaly zoma, ireo minisitra mpiahy (coach) ny taranja rugby dia ny minisitry ny Fampianarana teknika, ny Asa sy ny fampananan’asa ary ny Mponina. Nijery ny fotodrafitrasa handraisana ny fiadiana ny ho tompondakan’i Afrika (Can 2023), ho an’ny sokajy vehivavy amin’ny rugby lalaovina olona 15. Ankoatra izay, nankahery ireo mpilalaon’ny Makis Ladies ihany koa amin’izany fihaonana izany. Nanome toky fa hiezaka hanampy sy hanohana azy ireo, ka hanome maillots, survêtement, godasse sy fi­taovana hafa. Tsiahivina, fa hanomboka ny sabotsy 20 mey ho avy izao, ity Can ity. Firenena efatra no hiady lo­hany amin’io dia i Mada­gasikara, i Kenya, Cameroun ary i Afrika Atsimo. Hidona voalohany amin’ny Malagasy i Kenya. Nanamafy Rako­tomalala Marcel, filohan’ny Malagasy Rugby fa mizotra tsara ny fanomanantenan’ny Makis, azo lazaina fa efa vonona izy ireo, efa tomombana ihany koa ny kianja, handraisana ny lalao rehetra. Ho tonga eto Madagasikara ny 18 mey ireo delegasiona vahiny, ka hipetraka eny amin’ny Paon d’Or Ivato avokoa ireo ekipa efatra. Ho an’ny Makis Ladies, efa manao “mis au vert” ao amin’ny ivontoeram-piofanana Andohata­penaka izy ireo, izay efa nanomantena hatramin’ny volana febroary. Ankoatra izay, na­nambara ny filohan’ny Ma­lagasy Rugby fa fanakorontanana io Can io ny filazana fa hisy fifidianana filohan’ny federasiona ny andron’io sabotsy 20 mey io ka handraisana fepetra henjana ary am­piakarina amin’ny tribonaly.

Tompondaka

Ireo mpilalao mandrafitra ny Makis Ladies :
1-Claudia, 2-Virginie, 3-Fenitra, 4-Sariaka, 5-Sosoa, 6-Nandrianina, 7-Miora, 8-Fandrava, 9-Patricia, 10-Laurence, 11-Fenosoa, 12-Zoana, 13-Sophie, 14-Fabrinah, 15-Vonjy, 16-Vachilie, 17-Erica, 18-Aina, 19-Zarabe, 20-Mialy, 21-Monica, 22-Nasandratra, 23-Ginah, 24-Nanou, 25-Delphine, 26-Yvanna, 27-Jeanne.