«Festival internazionale delle Abilità Differenti». Io no anaran’ilay hetsika goavana hatao any Carpi, Italia, rahampitso alahady 21 mey. Nampita vaovao avy any an-toerana Rajery, izay Malagasy mpanakanto anisan’ireo loha-lisitra amin’ity hetsika ity. “Natao hanehoana ny talentan’ireo olona manana fahasembanana ara-batana na ara-tsaina nefa tena mahavita zavatra mahavariana ny hetsika. Hizara telo ny fampisehoana, ka ny tapany voalohany no hataon’ireo olona manana fahasembanana, taizan’ ny Nazareno Cooperative, mpikarakara. Ny tapany faharoa kosa, Rajery miaraka
amin’ireo mpandihy matihanina aty Italie. Ny tapany Fahatelo Rajery Trio, satria miaraka amiko aty i Zo eo amin’ ny amponga ary i Jery eo amin’ ny gitara”, hoy Rajery.
Efa nisy fampisehoana tokony notontosain’izy ireo ny alakamisy teo, saingy nofoanana izany noho ny orambe tany an-toerana. Nisy kosa ny fitsidihana sy fihaonana tany amin’ny toerana hiasan’ireo olona manana fahasembanana, ka hisy amin’izy ireo no hanao hosodoko mandritra ny fampisehoana hataon-dry Rajery.
Zo ny Aina
French