“Pique-nique géant Fresh”. Io no anarana nampisaloran’ny Star ilay hetsika izay karakarain’izy ireo ny alatsinain’ny Pantekoty, 29 mey izao, eny Analamanga Park. “Nanasa ny tarika ‘Zay sy ny AmbondronA, izay tarika samy manana ny lazany izahay, hanafana ny fotoana amin’ io”, hoy ny nambaran-dRamanankoraisina Setra, nandritra ny fampahafantarana ny hetsika tamin’ny mpanao gazety, omaly, tetsy Andraharo. Fiarahana azo lazaina fa efa hetahetan’ny maro, saingy tsy mbola nisy raha tsy izao izy ity. Voafetra ihany anefa ny toerana ho an’ny fampisehoana ao Analamanga Park, ka nasiana vidim-pidirana izany, raha ny fanazavana hatrany. Eo amin’ny 6.000 hatramin’ny 7.000 eo ihany mantsy no tafiditra ao, ka tsy afaka hatao toa ireo hetsika mahazatra fikarakaran’ny Star ny amin’ity. Na izany aza, tsy fampisehoana ihany fa fialamboly feno ho an’ny mpianakavy no homanin’ny mpikarakara amin’io andro io. Ankoatra ireo tarika roa ireo, hisy ny fanafanana ny fotoana hataon’ i DJ Cyemci sy i Lemec eo amin’ny fanentanana.
Fotoana iray nanehoan’ny Star ny endrika vaovaon’ny tavoahangin’ny zava-pisotro Fresh ihany koa io. “Ny endriny no niova fa ny tsirony mijanona araka ny nahafantaran’ny mpankafy azy hatrany”, hoy Razafinjato Fy, tomponandraikitr’ity vokatra ity.
Zo ny Aina
French