«Vazon’ny tanàna – Fiarahan’ny Zoky sy Zandry»… Samy manana ny tarika misy azy izy ireo ! Rampal sy i Tonton Pa ao anatin’ny tarika Rebika. I Rouj tarika Marovazo ary i Feno ao amin’ny tarika Lay. Izy ireo no hanafana ny alin’ny zoma 2 jona izao, manomboka amin’ny 7 ora sy sasany hariva, etsy amin’ny California, Andraharo. Samy hitondra ny sanganasany eny an-tsehatra ny tsirairay. Tsy ho latsa-danja sady efa andrasan’ny olona maro ihany koa ny fampiaraham-peo amin’io fotoana io. Raha tsiahivina, efa misy ny vokatra maromaro eo amin’ny fampiaraham-peon’i Feno sy i Tonton Pa. Tahaka izany ihany koa ny an’i Rampal sy i Feno izay efa tazana eny amin’ireo haino aman-jery maro samihafa. Vahiny nasaina i Bosco, hitondra ny «Hazavana» sanganasany vao navoaka farany teo. Anisan’ny nasaina ihany koa ny tarika Myr.
Fantatra fa toerana maro no efa vinavinaina hanohizana ity hetsika ity ato ho ato ka mety hisy mpanakanto hafa hanampy amin’ny fampiaraham-peo.
HaRy Razafindrakoto
French