Sahirana ny Tam Anosibe vao nahazo ny tapakila, hiatrehany ny ampahefa-dalana amin’ny fiadiana ny ho tompondakan’i Madagasikara, taranja rugby XXL Energy Top 20. Fihaonana, notanterahina omaly alahady 18 jona, teny amin’ny kianja Makis Andohatapenaka. Efa tany amin’ ny fanalavam-potoana “mort subite”, vao nandresy ny Mang’Arts Manjakaray, tamin’ny isa 29 no ho 26 ry zalahy. “Hors jeu” voatsaran’i Sitraka.
Niady ary nampitsanga-mitoetra hatramin’ny segondra farany ny fihaonana teo amin’ny roa tonta. Nitarika tamin’ny isa, 10 no ho 0 ny Mang’Arts teo amin’ny 15 mn voalohany ka “hors jeu” iray sy baolina nentin-tanana ny nahazoany izany. Taorian’ izay vao nanomboka nanafika ny Tam ka nahatsindry baolina ihany koa saingy tsy voatsaran’i Sitraka izany. Niezaka nanao totoafo tao anaty “pack d’avant” ny Tam, notarihin-dry Maholy sy ny namany. Nampiasa ny tolotolotra haingam-pandeha kosa ny Mang’Arts, niainga tao amin’i Rado sy i Faniry ary i Tahina.
Nitarika tamin’ny isa 17 no ho 10 ny Mang’Arts teo am-pialan-tsasatra. Fidirana faharoa, samy niezaka nanafika ny andaniny sy ny ankilany.
Nanantombo anefa Manjakaray ka nitarika 26 no ho 21 izy ireo, teo amin’ ny minitra faha-80. Segondra sisa nandrasana dia rava ny lalao saingy tsy nampoizin’izy ireo fa nahatonga baolina nentin-tanana ny Tam saingy tsy voatsara ka sahala 26 no ho 26 ny isa. Tany amin’ny “mort subite”, no nanao fahadisoana ny Mang’Arts ka nahazoan’ny Tam “hors-jeu” ka nitondra azy ireo, tany amin’ny fandresena.
Tompondaka
Ireo voka-dalao hafa
Cosfa (66) – (19) 3FAI ; TFA Anatihazo (43) – (30) UASC Cheminots ; STM (28) – (19) FTBA
French