Nosantarina, omaly, tetsy amin’ny BMH Isotry, ny hetsika didim-poitra faobe karakarain’ny Kaominina Antananarivo Renivohitra. Miandraikitra izany ny departemanta misahana ny sosialy sy ny fahasalamana. Tonga teny an-toerana ny ben’ny Tanàna Andriantsitohaina Naina sy ny mpiara-miasa aminy. Hitety ny CSB II eny amin’ny boriborintany 6 ny hetsika. Hitohy hatramin’ny faran’ny volana jolay 2023 izany, araka ny voalazan’ny tale misahana ny sosialy, Raharinandrasana Hajatiana.
Nahafahana nanatanteraka ny hetsika ny fiaraha-miasa teo amin’ny CUA sy ny fikambanana Manjaka Vintana Béton Armé. Ity farany izay nanentana teny anivon’ny fokontany. Mifanampy amin’ireo dokotera manao ny famorana mandritra ny hetsika ny fikambanana Misandratra.
Manodidina ny 1 500 ireo ankizilahikely kasaina hatao didim-poitra faobe ao anatin’ny 2 volana. Tanjona ny hisitrahan’ny zazalahikely ny fomba malagasy sy ny fanampiana ireo fianakaviana sahirana. Hitohy eny amin’ny CSB II Volosarika ny hetsika amin’ny herinandro.
Mikarakara famorana faobe toy izao ny Kaominina Antananarivo Renivohitra isan-taona.
Tatiana A
French