Efa mahazatra isan-taona ny « podium » etsy sy eroa, ny afomanga, ny matso ary ny fampisehoana
aorian’izay. Niavaka tamin’ity taona ity kosa ny seho ara-pilazantsara lehibe, nitondrana am-bavaka ny firenena tetsy Mahamasina.
«Antsam-piderana ho an’ny firenena ». Seho goavambe, tafiditra anatin’ny fankalazana ny faha-63 taona niverenan’ny fahaleovantena izy ity. Notontosaina ny alahady 25 jona teo, tetsy amin’ny kianja Barea Mahamasina, ho fitondrana am-bavaka ny firenena. Natao ho zava-dehibe izany ho fiderana ilay Mpahary, sy nanankinana ihany koa ny hoavin’i Madagasikara sy ny mombamomba azy rehetra eo am-pelatanany.
Tomefy olona, mpino mazava loatra, ny kianja Barea. Nanakoako ny hira fiderana, noelanelanina vavaka. Mpanakanto sy antoko mpihira mpanao hira fiderana maro no nifandimby teo amin’ny sehatra goavana, nampiaina ny fotoana. Singanina tamin’ireny ny seho sy fanentanana narahina vavaka nataon’ny Pasitera Jocelyn. Nafana sy nandrasan’ny maro ihany koa ny fandraisan’anjaran’i Rija Rasolondraibe, izay tonga an-tanindrazana manokana nanome voninahitra ny fotoana. Tsy nisy latsa-danja anefa izay natolotra teny an-tsehatra rehetra, toa ny nataon-dry Jaws Band, Joseph D’Af, KTKT Toliara, Tanora Masina Itaosy, Isaac de Paul, Pretra Aaron, Didà sy Tahiana, sns.
Nanotrona sy nanome voninahitra ny fotoana ireo mpitondra fanjakana, notarihin’ny filohan’ny Repoblika mivady. Hetsika efa fanao isaky ny fankalazana ny fetim-pirenena izy ity, saingy natao amina toerana goavana kokoa tamin’ity. Nitohy tamin’ny fijerena afomanga izany, satria sady nisy tao Mahamasina no nisy teny Anosy.
Zo ny Aina
French