Vory lanona tao Paris, ny herinandro teo, ireo zanaka am-pielezana “Diaspora” avy any Eoropa, niatrika ny Mihava Tour. Nitarika izany tany an-toerana ny depiote Randrianasoloniaiko Siteny sy ireo solombavambahoaka namany. Nambarany fa mila asa azo tsapain-tanana isika. Leo fampanantenana tsy tanteraka ny vahoaka ka ny tena azo atao sy maharesy lahatra no nambarany fa hampandrosoana ny firenena… “Hapetraka ho fototra ny fahaiza-mitantana sy ny fanjakana tsara tantana. Eo koa ny fitsipi-pifehezana sy ny fangaraharana ary koa ny fametrahana ny fanjakana tan-dalàna”, hoy izy. Natsidiny fa ilàna politika mazava, hamerenana ny fitokisan’ny vahoaka, ny fitsarana. Midika ho tsy fifampitokisana ny fitsaram-bahoaka mahazo vahana manerana ny Nosy. Tsy fahatokisana ny nametrahana ny Bianco sy ny Pac… Ilaina ny fahasahiana mandray fanapahan-kevitra amin’ny handravantsika ireo rafitra roa ireo, araka ny nambarany. “Tsy anjaran’ny depiote ny mitsara. Ovaintsika ny Lalàmpanorenana hamerenana ny fifampitokisana ary hapetraka ny rafitra hiarovana ny mpitsara”, hoy izy.
Synèse R.
French