Notontosaina tany Bern Suisse, ny sabotsy 24 sy ny alahady 25 jona lasa teo ny andiany fahadimy amin’ny «Swiss Girls Cup 2023», taranja baolina kitra. Anisan’ny nandray anjara, nisolo tena an’i Madagasikara ny Young Foot-ball Madera Club (Yfomac), ho an’ny latsaky ny 15 taona. Nandrombaka ny medaly alimo izy ireo. Baolina kitra lalaovin’olona 9.
Mendrika ny zava-bitan’ny Yfomac. Klioba mpitaiza sy mpamolavola ankizivavy amin’ ny baolina kitra. Laharana fahatelo tamin’ireo firenena 32 nifaninana. Nampiaiky ny rehetra ny fahaiza-manao ara-teknikan’ny mpilalao tsirairay. Tao amin’ny vondrona «B» ny Yfomac. Tsy resy mihitsy nandritra fifanintsanana isam-bondrona. Nitazona ny laharana voalohany.
Anisan’ny fihaonana lehibe, andraisan’ireo firenena goavana anjara, ny fifaninanana “Swiss Girls Cup 2023”. Madagasikara no hany mpandray anjara sambany niatrika izany.
Samy niresaka ny zava-bitan’ny Yfomac avokoa ireo gazety sy ny mpampahalala vaovao any an-toerana. Tsy nitsoaka ady mihitsy ireo tovovavy gasy na tao anaty rotsakorana aza ny nanatontosana ny lalao sasany. Taorian’ity “Swiss Girls Cup” ity, mbola nihazo an’i Frantsa ny Yfomac. Hiatrika lalao telo hafa indray mialoha ny hodiana aty Madagasikara.
Tompondaka
French