Tafiditra ao anatin’ny fanamarihana ny faha-20 taonan’ny Institut National de Santé Publique et Communautaire (INSPC) Mahamasina ny fanitarana ny lalam-piofanana. Hisokatra ny économie de la santé, médecine de travail, ny ingénierie biomédicale ary ny ingénierie informatique médicale. Nanambara izany ny taleny, Hanitriniala Sahondranirina, omaly.
Hanofanana manam-pahaizana manokana hikojakoja ny fitaovana hitsaboana marary eny amin’ny hopitaly ireo sampam-piofanana vaovao.
“Ialana amin’ny fandanindaniana amin’ny fividianana fitaovana izany. Fitaovana tsara sy maharitra ary hositrahan’ny besinimaro amin’ny vidiny mirary no tanjona”, hoy hatrany ny fanazavana. Manome fiofanana matihanina ho an’ny dokotera sy mpiasan’ny fahasalamana, ny ivontoeram-piofanana. Ho afaka hiasa ara-dalàna amin’ny toerana natokana ho azy izay mahavita fiofanana. Manome tohana ara-teknika sy ara-tsiansa eo amin’ ny sehatry ny fahasalamana ihany koa ny sampam-piofanana vaovao.
« Tanjona ny hanatsarana sy hanavaozana ny asa fiofanana ka hampiakarana ny lentan’ny diplaoma avoaka », raha ny fanazavana hatrany.
Mampitombo ny traikefa amin’ny fitantanana ankapobeny sy amin’ny ady amin’ny areti-mifindra ihany koa ny INSPC. Fiofanana miainga amin’ny filan’ny minisitera no omena sehatra. Tanjona ny mba ho manam-pahaizana vonona sy mitondra avy hatrany ny fahaiza-manaony eny anivon’ny fiarahamonina no voaofana.
Tatiana A
French