« Seha-pikarohana ara-javakanto na « laboratoire de musique » ny Vox Angeli. Ny mozika izay mety sy afaka trandrahana ho kanto dia ezahina avoitra avokoa ». Fanazavana nomen’i Fahombiazana Andrianamelasoa io. Izy no mpitarika ny Vox Angeli Vivace. Mivelatra amin’ny mozika, araka izany, ity amboaram-peo ity, na dia manana fironana amin’ny mozika klasika aza. Tsy diso anjara ny hira malagasy, ary porofon’ izany ny namelomana sy namerenan’ny Vox Angeli Vivace indray ireo sanganasan’i Gilles Ramiarison.
Nivoaka nandritra ny seho notontosain’izy ireo ny alahady teo ny “Tsy hay hadinoina”. Mirakitra hira 7, noforonin’i Gilles Ramirarison avokoa ny vokatra. “Nisy ny fiaraha-miasa teo amin’ny fianakavian’ny mpamorona, nanomboka tamin’ny taona 2015 tany ka niafara amin’ny famoahana rakikira ”, hoy hatrany ny fanazavan’ny mpitarika.
Raha hiverenana kely, natao hamaranana ny faha-10 taonan’ny Vox Angeli Vivace ilay fampisehoana milohateny hoe “Smile”, natao tao amin’ ny Saint Michel Amparibe, ny sabotsy lasa teo. Hira maherin’ny 20, nahitana ireo klasika vahiny sy hira malagasy no nalahatr’izy ireo. Vahiny nasaina manokana i Bodo , nandray anjara tamina hira roa.
Zo ny Aina
French