Miisa 11 043 836 na 81, 25% tamin’ny vinan’ny Ceni 13,5 tapitrisa no isan’ny mpifidy, araka ny tatitry ny Ceni, notarihin’ny filohany, Andrianarisedo Dama A., teny Alarobia, omaly, tamin’ny fanavaozana manontolo ny lisi-pifidianana. Nitombo 293 902 izany, fa 10 749 934 ny fanavaozana isan-taona (Rale), taona 2021-2022. Misy faritra fito latsaka noho ny Rale ny isan’ny mpifidy amin’ny fanavaozana manontolo: Amoron’Imania, Atsimo Andrefana, Menabe, Bongolava, Vakinankaratra, Melaky, Analamanga.
Mahatratra 51,46% ny lehilahy amin’io rejisitra nasionaly io, ary 48,54% ny vehivavy. 40,27% ny eo anelanelan’ny 36-60 taona, 26,59% ny eo anelanelan’ny 26-35 taona, 21,96% ny 18-25 taona, 7, 78% ny 61-70 taona, ary 3, 39% ny mihoatra ny 70 taona.
Misy antony ny tsy mahatafiditra ny olompirenena
Miisa 1 924 648 kosa ireo mpifidy tafiditra tao amin’ny Rale, nefa tsy tafiditra amin’ny fanavaozana manontolo. Maro no anton’izay. Misy mihevitra fa efa tafiditra tao amin’ny Rale, ka tsy mila misoratra anarana intsony. Nisy nifindra monina, tsy mahafantatra ny fisian’ny fanavaozana manontolo, tsy manana karapanondro, tsy te hisoratra anarana…
“Samy tomponandraikitra ny rehetra”, hoy ny filohan’ny Ceni ny amin’izany.
Na izany aza, tsy hampidirina ao anatin’ny rejisitra nasionaly ho azy amin’izao ireo tsy tafiditra. Lisitra madio no atao, misy finiavan’ny olompirenena hisoratra, tsy misy anarana miverina. Tsy miantoka ny mety ho fisian’ny hosoka koa ny Ceni : fahadisoana momba ny olompirenana, fananana karapanondro roa na telo…
R. Nd.
French