Tafiditra ao anatin’ny fandaharam-potoanan’ny « Famoloana Telozoro” ilay velakevitra hotontosain-dRavorombato Ony Lantoarimamy, nomena ny lohahevitra : « Ny fahalevonan’ny talenta eo amin’ny pôeta sy ny mpanoratra ». Famelabelaran-kevitra hotanterahina ny 2 aogositra izao, ao amin’ny efitrano Dox, Tranombokim-pirenena Anosy. Tari-dresaka nataon’ity mpanoratra ity ny fanehoana fa misy ny talenta fa mety ho levona noho ny antony samihafa.
Nataony ho ohatra niaingana tamin’izany ny hoe : « ananana ny talenta manoratra, saingy, tsy nampisongadina azy firy izany. Naleony nitrandraka talenta hafa tahaka ny hira. Io no ahazoany vola, laza… Levona ilay talenta manoratra ». Tranga hafa : « ananany ilay talenta. Tonga ny laza, ny vola, ny voninahitra… Saingy, tsy nihaino ny hafa intsony izy noho io toerana efa misy azy io. Raha misy ny fahadisoana any amin’ny teny, tsy ho voahitsy. Ny soratra anefa mila fanabeazam-boho ny teny isan’andro. Mitarika any amin’ny fahalevonan’ny talenta ihany koa io toetra tsy mihaino ny hafa io », hoy hatrany Ravorombato Ony.
Marihina fa ankoatra ny maha mpampianatra mpanabe azy, mpanoratra koa Ravorombato Ony Lantoarimamy. Anisan’ny ahafantarana azy ny tantara foronina, ny tantara fandefa amin’ny Radio.
HaRy Razafindrakoto
French