Filohan’ny FJKM : “Olona azo ireharehana ny mpanao politika”

Nankalazaina tany Toamasina, ny faran’ny herinandro teo, ny faha-55 taonan’ny FJKM. Ankoatra ny firesahana ny fiainam-piangonana, nitondra hafatra ho an’ny mpanao politika koa ny mpitandrina Andriamahazosoa Irako Ammi nandritra izany.

“Eo amin’ny sehatry ny politika, ho kristia­nina vavolombelon’i Kristy. Ka i Jesoa Kristy no tompon’ny baiko, fa tsy ny antoko politika. Ry kristianina FJKM mirotsaka eo amin’ny sehatra politika manokana dia olona azon’i Jesoa irehare­hana toa an’i Joba hoe: “Efa nandinika an’i Joba mpanompoko va ianao? Fa tsy misy tahaka azy eny ambonin’ny tany, fa olona marina sy mahi­tsy izy sady matahotra an’An­driamanitra ka mifady ny ratsy.” (Job 1: 89)”
Io ny nambaran’ny filohan’ ny FJKM, ny mpitandrina An­driamahazosoa Irako Ammi, tamin’ny fankalazana ny faha-55 taonan’ny FJKM, tany Toa­masina, ny faran’ny herinandro teo. “Mihavaozà mandrakariva, ry FJKM. Fiango­nana “réformée” ianao, ka an­tsoina hihavao mandrakariva, araka ny tenin’Andriamanitra nahate­rahanao tamin’ny 1968 manao hoe: Indro havaoziko ny zavatra rehetra (Apokalipsy 2l: 5).”, hoy izy.
Nanainga ny fiangonana tsy maintsy hihavao ka hiroso amin’ny fampamokarana ny fandalovan’ny covid-19. Ho fampahombiazana ny fitoriana ny Filazantsara sy ho fampandrosoana ny fiangonana izany. Samy tsy maintsy miezaka mamantatra ny sitrapon’ny Tompo ny eo anivon’ny sahan’ ny FJKM rehetra ny amin’izay mety ho loharanom-bola maha­ritra tokony hataony ho fanatanterahana ny firosoany amin’ ny fampamokarana.
Tsy maintsy miroso hiatrehana ny hoavy sy azo antoka ny rehetra hanatrarana ny vina fototra: mbola ho firenena kristianina hatrany i Madagasi­kara amin’ny taona 2118. Izany hoe afaka 100 taona izany, niainga tamin’ny fotoana nanorenana ny vina.

R. Nd.