TSELATRA

Naiditra am-ponja ilay lehilahy nanolana ankizivavy 5 taona tao amin’ny fokontany Ankosy, kaominina Merimanandroso, distrikan’Ambohidratrimo, ny fa­ran’ny herinandro teo. Napetraky ny ray aman-dreniny tao amin’ny renibeny io zaza io. Nanararaotra anefa ilay lehilahy rehefa tsy teo tampoka koa io reniben’ilay ankizivavy io. Voasambotra ny nahavanon-doza ny 22 oktobra teo ka nigadra.
Lavon’ny mpitandro filaminana ny dahalo telo lahy tompon’antoka tamin’ny fahafatesan’ny zandary am-perinasa iray tao amin’ny fokontany Bemahogo, kaominina ambanivohitra Ankaraobato, distrikan’i Marovoay, ny alin’ny 31 oktobra teo. Nifandona tamin’ireo olon-dratsy ireo ny mpitandro filaminana, ny alin’ny 12 hifoha ny 13 oktobra lasa teo, ka nahalavo io zandary io. Nanao fikarohana ny zandary ao an-toerana ka izao nahitam-bokany izao.
Raim-pianakaviana iray efa nizaitra loha namoy ny ainy tampoka tany anaty taxi-be, tao Anosiala-Ambohidratrimo, omaly. Niakatra taxi-be teo Ambohidratrimo izy ary nitambotsitra tampoka. Naterin’ny zandary tao amin’ny CHU Anosiala izy saingy tsy tana ny ainy.
Lehilahy iray niditra an-tsokosoko ka nanolana vehivavy iray 22 taona tao Bealanana, ny alin’ny 26 oktobra teo. Tsy tao an-trano ny vadin’io vehivavy io no niditra moramora ny trano ilay mpanolana. Nametraka fitarainana teny amin’ny mpitandro filaminana ilay lasibatra ka voasambotra ny nahavanon-doza.