20 taona ny gazetintsika!

 

“TARATRA ny anarany. Hitaratra ny zava-misy rehetra, na eo amin’ny tontolon’ny fihariana sy ny toekarena na koa ny tontolo politika. Hizara aminao ny ezaka sy ny olana mbola
sedrain’ny fiarahamonina. Hitatitra ny vaovao ara-panatanjahantena sy ny alavoly. Hanolotra ny mahaliana avy any am-pita, izay tsara arahina noho ny fitsokan’ny rivotry ny fanatontoloana. Ary farany, nefa tsy ny kely indrindra, hanondrotra ny kolontsaina malagasy…”. 20 taona katroka anio, ny nivoahan’ity ampahan-dahatsoratra ity, teto amin’ny gazety Taratra, laharana voalohany, ny 19 febroary 2004.
Nalaina tamin’ny “Indraimbava”, matoan-dahatsoratra voalohan’ny gazetintsika, izay nosoratan’ny tonian-dahatsoratra voalohany, Hanitra Andriamanantena Rabetoko­tany, io. 20 taona aty aoriana, mbola ity am-pelatananao ity ny gazety Taratra. Ny gazetintsika. Ireo voalazany eo ambony ireo ny fototra. Nisy ny fanavaozana manaraka ny fivoaran’ny tonto­lon’ny haino vaky jery, satria manohy hatrany ny andraikiny ny gazety.
Tsy mora ny sedra nolalovana tao anatin’izay 20 taona izay. Maneran-tany mihitsy ny olana sedrain’ny gazety an-taratasy, noho ny fivoaran’ny teknolojian’ny serasera sy ny fifandraisana, indrindra ny tambajotran-tserasera. Isan’andro, isan’ ora, isa-minitra ary isan-tsegondra anefa ny fampitam-baovao. Ka ho faty ve izany ny gazety an-taratasy, toy ny any amin’ireo firenen-dehibe, ohatran’i Sina?
Eny! Mbola vonona hiatrika ny 20 taona ho avy, sy izay manaraka eo ny gazety Taratra. An-tsoratra ny niantombohana. Ny vaovao amin’ny teny malagasy no ifaharana. Hitohy hanaraka ny vanim-potoana ny fivoahan’ny gazety an-taratasy. Ny an-tambajotra koa efa nirosoana. Izay mahavantana antsika, anareo, no imasoanay. Ny ampanantenainay, mbola ho eo hatrany ny gazety Taratra.
Mbola eo ianareo? Hanohy ny lalana isika…

Zo ny Aina Randriatsiresy