Nosokafana tamin’ny fomba ofisialy ny, 13 desambra teo ny tetikasa Momentum Country and Global Leadership (MCGL), niarahana tamin’ny USAID. Tetikasa hampitombo ny vokatra ara-pahasalamana any amin’ny faritra 15 eto amin’ny firenena izy io.
“Hanampy ny minisiteran’ny Fahasalamam-bahoaka hamolavola politika hanatsarana ny fandaharanasan’ny fanjakana momba ny fahasalamam-bahoaka eto Madagasikara ny MCGL”, hoy ny Tale lefitry ny biraon’ny fahasalamana eo anivon’ny USAID/Madagasikara, Dr. Razafindrafito Haja.
Hanakaiky kokoa ireo mponina izay mila fitsaboana nefa lavitra tobim-pahasalamana ny tetikasa. Hampihenana ny taham-pahafatesan’ny zaza sy ny reny, hiady amin’ny Covid19 sy hampitombo ny isan’ny olona vita vaksiny, ary hampihena ireo karazan’aretina izay mety hahafaty ny zaza nefa azo sorohina.
Hampiditra fanavaozana toy ny “Human Centered Design” ny tetikasa. Fomba iray hanampiana ireo tompon’andraikitra ara-pahasalamana hihevitra ny fotoana sy ny toerana itadiavan’ny olona tolotra ara-pahasalamana sy ny fomba hanatonana ankizy bebe kokoa amin’ny fanaovana vaksiny efa mahazatra.
Nanomboka ny taona 2020, nihena ny tahan’ny fanaovam-baksiny mahazatra ho an’ny ankizy eto Madagasikara. Anton’izany ny tsy fahampian’ny fahazoana fitsaboana any ambanivohitra.
Tatiana A
French