Hentitra ny filoha Rajoelina Andry manoloana ireo mitady fanakorontanana. Nohamafisiny tamin’ny lahateny nataony tany Toamasina, afakomaly, koa fa mila hajaina ny safidim-bahoaka.
Fotoana hiandrasana ny valim-pifidianana ofisialy, avy amin’ny Fitsarana avo momba ny Lalàmpanorenana (HCC) isika eto Madagasikara amin’izao. Ao anatin’ izany indrindra no tokony hitandroana hatrany ny filaminana sy ny fahatoniana. « Aoka hohajaina ny safidim-bahoaka», hoy ny filoham-pirenena, Rajoelina Andry. Nampitandrina ireo izay mivoy fanakorontanana ihany koa izy ny amin’ny tsy fileferana amin’ny fampiharana ny lalàna ho an’ ireny vondron’olona ireny. Hitondra firafitra vaovao eny anivon’ny Antenimierampirenena ny vokatry ny fifidianana solombavambahoaka natao ny 29 mey 2024 teo. Izay firafitra vaovao izay no ametraka ny endrika vaovaon’ny fifandajan-kery politika eto amin’ny firenena. Nampahatsiahivin’ny filoha Rajoelina, araka izany, fa izay hery politika manana ny maro anisa ao amin’ny Antenimierampirenena no hanolotra izay ho praiminisitra. Ity hery politika manana ny maro anisa ity ihany koa no handrafitra ny governemanta. Nanararaotra ny fitokanana ny Boulevard Ratsimilaho, tany Toamasina, ihany koa ny filoha nampitana hafatra mahakasika ny fitantanana ny raharaham-pirenena. « Tsy misy fialantsiny azo raisina intsony fa ajanona ireo mpitantana tsy maharaka ny hafainganam-pandehan’ny filoha amin’ny fampandrosoana ny firenena », hoy ny filoha. Anton’izany ny fanafainganana ny fampandehanana ny asa fampandrosoana. Notanterahina ny faran’ny herinandro teo, tao Toamasina, ny fitokanana ireo fotodrafitrasa maro samihafa, mamaly ny filan’ny vahoaka eny ifotony. Anisan’izany ny Boulevard Ratsimilaho, ny toerana fialana voly « Miami ». Mbola hisy ihany koa ny fitokanana ireo fotodrafitrasa eo andalam-pahavitana, araka ny nambaran’ny filoha hatrany.
Lin
French