Miisa 40 ireo Malagasy niatrika ny fivahinianana Masina natao tany La Mecque, any Arabie Saoudite, herinandro vitsy lasa izay. Anisan’ireo voafidy sy voasa manokan’ny mpikarakara ny lefitry ny lehiben’ny fonjan’i Tsiafahy, i Charles Arnaud Ioussouf. Nambarany amin’izao andro voalohan’ny kalendrie silamo izao fa zava-dehibe amin’ny fitsinjovana ny hoavin’ny olombelona mino sy madio ny fivahinianana tany an-toerana. « Laharam-pahamena ho anay ny fitrotroana am-bavaka ny hoavin’ny firenena Malagasy. Anisan’izany ny sehatry ny fandriampahalemana sy ny asa », hoy izy. Nanteriny koa fa ny fangataham-pitahiana ho an’ny mpitondra sy ny vahoaka. Tafiditra anatin’ny fanompoana ny fitiavan-tanindrazana ary manan-kasina i Madagasikarantsika ity, araka ny nambarany.
Mpiasan’ny fonja tia manampy ny hafa sy misokatra amin’ny rehetra i Ioussouf. « Tia manampy ny hafa na inona na inona finoany sy fihaviany », hoy ireo mpiara-miasa aminy.
Etsy andaniny, ahitana manamboninahitra eo anivon’ny tafika sy polisivavy koa nanao ny fivahinianana tany La Mecque. Nihazo ny tany Madina koa izy ireo, ary nivavaka tao amin’ny mosken’ny mpaminany Masina Mohamed.
Tsiahivina fa toerana manan-danja amin’ny finoana silamo maneran-tany ny any La Mecque ary natao tany an-toerana ny « hajj », fototra fahadimy ho an’ny silamo ary efa fanao isan-taona.
Synèse R.
French