Nanolotra fitaovana informatika ho an’ny minisiteran’ny Fanabeazam-pirenena ny masoivohon’i Frantsa, omaly. Notanterahina teny anivon’ny IFNP Mahamasina izany. Nahitana fitaovana maro toy ny valizy misy “tablette” 24, ordinatera, video-projecteur, fihainoana, clés USB ary indrindra “edbox” miisa 140. Hisitraka izany ny ivontoeram-panabeazana Lycée anatin’ny faritra 12 manerana ny Nosy raha ny fanazavan’ny tompon’andraikitry ny MEN. Tafiditra ao anatin’ny tetikasa “Eduscac” ity hetsika ity. Izay hikendrena ny fomba fiasan’ny mpampianatry ny Lycée ka hampiharana ny fombam-pampianarana vaovao OSE ( Fikambanana, fiarahamonina, Toekarena), apetraky ny minisiteran’ny Fanabeazam-pirenena. Hanampiana ny mpampianatra sy hanofanana azy ireo ireto fitaovana vaovao ireto. “Mba hahafahany mizara fahalalana vaovao any anaty efitrano fianarana ka hanatsarana ny kalitaom-pampianarana misy eto Madagasikara ary hahafahan’ireo mpampianatra mikaroka fahalalana hatrany”, hoy i Patrick Bosdure, talen’ny Ivontoeram-pampianarana frantsay eto Madagasikara (IFM). Maro ny mpiara-miasa amin’ity tetikasa ity. Anisan’izany ny minisiteran’ny Fanabeazam-pirenena (MEN), ny sekoly IFNP miisa 28, ny Alliance Française ary ny “Acces Mad”.
Tsiahivina fa efa nanomboka tamin’ny marsa teo ity tetikasa “Eduscac” ity ka hifarana ny taona 2024. Fanandramana aloha no atao fa tsy maintsy ho tonga any amin’ireo faritra 12 ireo ny fitaovana, hoy ny tompon’andraikitra. Hery lehibe ho an’ny minisiteran’ny Fanabeazam-pirenena ny fahazoana ireto fitaovana ireto, hahafahana manatanteraka ny fanovana kendrena hatao eny anivon’ny fampianarana.
Mino ( Mpianatra Asa)
French