Erick Manana sy Jenny Fuhr : 15 taona tao anaty tsikombakomba mozika

Homarihina amin’ny seho goavana ny 15 taona niarahan’i Eric Manana sy Jenny Fuhr miasa. Fotoana hiverenana amin’ny hira nanamarika ny fampiaraham-peon’izy ireo izany.

“2 Cv an-dRandria”. 13 taona lasa izay no ni­voahan’io hira io. Hira nanamarika voalohany ny fampiarahana mozika teo amin’i Erick Manana sy i Jenny Fuhr izany. Efa roa taona nialoha
izay anefa no nanomboka ny tsikombakomba teo amin’ny mozika, ho an’ireto mpanakanto ireto. Feno 15 taona, araka izany, ny fiarahana ka mba homarihina amin’ny seho goavana izany.

Hotontosaina ny alahady 18 aogositra izao, manomboka amin’ny 2 ora atoandro, ao
amin’ny Lapan’ny kolontsaina sy ny fanatanjahantena Maha­masina io seho io. Fotoana hiverenana amin’ireo hira nanamarika ny fam­piaraham-peo teo amin’i Erick Manana sy i Jenny, tao anatin’izay 15 taona izay ny tapany voalohany. Misy ireo hira noforonina, ao koa ireo hira naverin’ireto mpa­nakanto ireto araka ny fandrindrany azy.
Manan-talenta maro

Ilay fifehezan’i Jenny ny hira malagasy eo ihany, fa anisan’ny mampihaiky ny mpankafy aminy koa ny talentany eo amin’ny karazan-javamaneno. Nitendry lokanga no nahafan­tarana azy voalohany, avy eo sady nitsoka sodina. Nikitika valiha taorian’ izay, ankoatra ireo zavamaneno vahiny izay efa hainy taloha. Nia­lohan’ny nifanojoan’ny lalany tamin’ny an’i Erick Manana, efa mpankafy ny mozika malagasy ity mpanakanto teratany alemà ity. Mpikaroka sy mpandalina ma­nokana ny mozika izy, ka ireo kapila mirakitra mozika mala­gasy nangonin’ny rainy no nandrisika azy handalina bebe kokoa an’izany. Efa anisan’ireo mpijery nandritra ny fampisehoana nataon’i Erick Manana tao amin’ny Lapan’ny kolontsaina sy ny fanatanjahantena Maha­ma­sina ihany koa i Jenny.
Mazava loatra fa hanasa ireo mpiara-dalana aminy ha­tra­min’izay isaky ny mandalo an-tanindrazana, hifanotrona aminy sy i Jenny i Erick Ma­nana. Ny ta­rika Feo Gasy izay natsangany, ahitana an’i Koli­bera, Benny ary i Nini. Ry Benny sy Bebey, na­many tao amin’ny Lôlô sy ny tariny, i Dama izay niara-nanatontosa fampisehoana maro taminy ary i Voara Fangia Kalo Gasy.

Zo ny Aina