Namoaka fanambarana ny eo anivon’ireo fiarahamonim-pirenena miisa 86 eo anivon’ny OSC, omaly, tetsy Ambatonakanga, amin’izao hiatrehina ny fifidianana eny anivon’ny kaominina izao. Maromaro ireo fitakiana sy fepetra napetrak’izy ireo.
“Tokony hamafisina ny fangaraharan’ny fandaniam-bola mandritra ny fampielezan-kevitra amin’ ny alalan’ny fanasiana sazy mifandraika amin’ny kandidà mpandika lalàna, tsy manokatra kaonty manokana ho an’ny propagandy”, hoy izy ireo. Eo koa ireo tsy manendry mpitambola, ary tsy mametraka ara-potoana ny tatitra ara-bola momba ny fampielezan-kevitra.
Takin’ny OSC koa ny fanitsiana ny lalàm-pifidianana mba hamenoana ireo fahabangana momba ny fampielezan-kevitra mialoha ny fotoana. Ny famatsiam-bola mandritra ny propagandy ary ny tsy fahampian’ny fotoana hikirakirana ny disadisa sy fifanolanana ara-pifidianana
Angatahin’ireto fiarahamonim-pirenena ireto koa ny fananganan’ny fanjakana, ny “Autorité nationale de régulation de la communication médiatisée – ANRCM” sy ny fanamafisana ny “Commission de contrôle de la vie politique – CCFVP”, araka ny voafaritry ny lalàna.
Hetsika an-dalambe sy fivoriana ankalamanjana
Takin’izy ireo koa ny fampiharana ny mangarahara eo amin’ ny fitantanan-draharaham-panjakana sy ny tribonaly misahana ny fifidianana amin’ny alalan’ny fanalalahana ny fahazoam-baovao sy torohay ilaina sy araka ny lalàna, araka ny fanambarana hatrany.
Tokony hofoanana ireo sakantsakana amin’ny fahalalahana hivory ankalamanjana sy hanao hetsika an-dalambe.
Tsipahin’izy ireo koa ny tsindry hampiharina sy ny fanajana ny tsy fitanilan’ny sampandraharam-panjakana sy ny mpiasam-panjakana, indrindra eo amin’ny sehatry ny fampianarana, ny fahasalamana, atitany, mandritra ny fotoam-pifidianana.
Synèse R.
French