Natomboka ny faran’ny herinandro teo ny tetikasa andrana ho fanatsarana ny fakana sy ny fitanterana ny fako, ao amin’ny fokontany Ampefiloha. Tafiditra amin’ny tetikasa fanatsarana ny rafi-pitantanana ny fako eto Antananarivo (Gesda) nizany, izay fiaraha-miasa eo amin’ny fanjakana malagasy sy ny fanjakana japonais. Ny volana febroary 2023 no niandoha ny fiaraha-miasa ho fanavaozana ny fitantanana ny fako eto an-dRenivohitra. Dingana voalohany notanterahina ny fanavahana ny karazana fako teny ifotony miainga any an-tokantrano mihitsy sy eny anivon’ny toeram-pivarotana maromaro. Andraikitry ny Société municipale d’assainissement, SMA, no maka ny fako tsy tapaka fa ny mpiasan’ny tetikasa kosa no mikarakara ny fako eny amin’ny toby samihafa misy mba hampirindra ny tetikasa.
Mifarimbona ny minisiteran’ny Rano sy ny Kaominina Antananarivo Renivohitra, ny SMA ary ny Jica, amin’ny fanatanterahana izany. Tanjona ny hanana tontolo madio eny amin’ny fokontany Ampefiloha rehefa voatantana tsara ny fako amin’ny teny filamatra hoe « fako tsara tantana, Ampefiloha cité maha te honina ».
Telo volana ny faharetan’
ny tetikasa ka andrana ny ety Ampefiloha fa hitarina amin’ny fokontany hafa vonona handray izany any aoriana. Nampahafantarina ny mponina teny an-toerana ny tombontsoan’ny fahaizana mitantana ny fako miainga any an-tokantrano iarahana amin’ny mpanohana.
Vonjy
French