Notanterahina tany Fianarantsoa, nanomboka ny 8 aogositra ka hatramin’ny faran’ny herinandro teo, ny fifaninanana karaté “Challenge de Betsileo”. Fifaninanana nokarakarain’ny ligin’i Matsiatra Ambony, teo ambany fiahian’ny Federasion’ny Karate-do malagasy. Nambaran’ny filohan’ity federasiona ity, Ratefinanahary Émile, fa niakatra ny haavo teknikan’ny mpikatroka. ” Nisy vokany tsara ny fampivondronana sy fanofanana ireo mpikatroka”, hoy hatrany ny nambarany. Ankoatra ny maha fifaninanana tafiditra anatin’ny fandaharam-potoan’ny federasiona ny “Challenge de Betsileo”, nahafahan’ireo mpifaninana nanatsara ny filaharany ihany koa ity fifaninanana ity. “Mba tsy hisian’ny fiangarana fa izay tompondaka sy tsara filaharana no misolo tena an’i Madagasikara, amin’ny Fifaninanana iraisam-pirenena no anton’ny fifaninanana toy izao”, hoy hatrany ny fanazavan’ity filohan’ny FKM ity. Tsiahivina fa mpikatroka manodidina ny 320 no nifaninana tamin’ny “Challenge de Betsileo” ary nandray anjara avokoa ireo tompondakan’i Madagasikara sy ireo efa mandrafitra ny ekipam-pirenena. Ny fiadiana ny tompondakan’i Madagasikara indray no fifaninanana manaraka, izay hatao any Toliara, ny 31 oktobra hatramin’ny 2 novambra izao.
Mi.Raz
French