« Fety de Baskety e! » : hatao anio ny antsapaka

Hotontosaina, anio, ny antsapaka ho an’ny fifaninanana “Fety de Baskety e!”, hankalazana ny faha-15 taonan’ny AT2B Andraisoro. Fifaninanana hatao manomboka ny alahady 15 septambra izao, amin’ny kianja telo, ao amin’ny boriborintany faha-5. Hatramin’ny omaly, mbola nisy ireo ekipa tonga nisoratra anarana hifaninana amin’ity lalao ity, anisan’izany ny GNBC (U12L, U12V, U16V), Cosfa (U12 V), Tana Shooter (U12L),MMBC (Vétéran V), Astar (Vétéran L), AMBB (Vétéran L), Lionna (Senior V),FNBC (Senior L), MB2All (Senior L) ary ny SFM (Senior L).
Araka izany, manodidina ny 70 eo ny isan’ny ekipa handray anjara, izay mbola misokatra ny fisoratana anarana. Ankoatra ny fanatanterahana ny antsapaka, ho amin’ny anio, ho fantatra ihany koa ny fandaharan-dalao ny alahady 15 septambra izao. Tsiahivina, andiany faha-4 amin’ny “Fety de Baskety e!” ho fankalazana ny faha-15 taonan’ny AT2B ity karakaraina ity. Ny taona 2008 no nanatanterahina voalohany ity hetsika “Fety de Basikety e!” ity, sady nitokanana ny kianja basikety teny Andraisoro vita “goudron”. Ny taona 2013 kosa no feno 5 taona ny AT2B ary nokarakaraina ny andiany faharoa.

Mi.Raz