Nanao tatitra ny fandraisana ireo mararin’ny raboka ny minisiteran’ny Fahasalamam-bahoaka ho an’ny taona 2022. Fantatra fa nahatratra 45 245 ireo marary noraisina an-tanana manerana ny Nosy tamin’ny taon-dasa, tamin’ireo tobim-pahasalamana misahana ny aretina raboka.
Maimaimpoana hatrany ny fikarakarana ny marary manomboka amin’ny fizaham-pahasalamana, mandalo amin’ny fitiliana sy ny fitarafana ary ny fanafody sy ny fanaraha-maso omban’ny torohevitra ara-tsakafo….
Arakaraka ny fizahana no hahafantarana ny tokony hatao amin’ny marary. Raha raboka tsotra dia manao fitiliana rehoka maimaimpoana any amin’ny laboratoaram-panjakana. Misy koa ny fitarafana ny tratra maimaimpoana ataon’ny fanjakana amin’ny alalan’ny fandaharanasa misahana ny tiberkilaozy amin’izao fotoana sitrahan’ireo olona ahina ho misy tiberkilaozy.
Miankina amin’ny valin’ny fitiliana no handraisana an-tanana azy indray avy eo.
Mandritra ny enim-bolana ny fitsaboana ary arahi-maso akaiky ny marary hahatojo hatramin’ny farany ny fitsaboana mba hahazo fahasitranana tanteraka.
Isa-maraina, isan’andro no ohanina ny fanafody, ora iray mialohan’ny sakafo. Maimaimpoana ny fanafody sy ny fitarafana ary ny fitiliana.
Azo sitranina ny aretina tiberkilaozy, ary aretina tsy mahamenatra ka tsy tokony hisalasala manatona tobim-pahasalamana raha mikohoka mihaotra ny 3 herinandro.
Tatiana A
French