Tsy azo hanaovana hetsika politika intsony eny Tsimbazaza. Ho arahi-maso akaiky izay mivezivezy eny amin’ny Antenimerampirenena.
“Tsy azo hanaovana hetsika politika intsony eto amin’ny Antenimierampirenena. Izay no fepetra noraisina. Tsy mandray ankoatra ny fanaovan-tsakafo ny ao amin’ny “cafétaria”. Tsy mandray olon-kafa, na mpanao politika na valandresaka ho an’ny mpanao gazety.” Io ny nambaran’ny filoha lefitry ny Antenimierampirenena, faritanin’Antananarivo, Raholdina Naivo, teny Tsimbazaza, omaly, ny amin’ny nanalana ny filohan’ny Antenimierampirenena teo aloha, Razanamahasoa Christine. Raha misy depiote mitarika olona hikorontana na hanongam-panjakana, tsy ao anatin’ny tombon-jo parlemantera intsony izany. Harahi-maso akaiky izay mifamezivezy eny. “Hisy ny fisamborana raha mbola misy manakorontana eto”, hoy izy. Mila filaminana ny firenena ary mila tony ny vahoaka amin’ny fiatrehana fifidianana depiote. Eto amin’ny faritanin’Antananarivo ny Antenimierampirenena. Manomboka izao, averina amin’
ny hasiny amin’izay ny Antenimierampirenena, izay gaboraraka nandritra ny taona maromaro.
“Manana ny fitsipika anaty mifehy azy ny Antenimierampirenena. Rehefa tsy eo ny filohan’ny Antenimierampirenena, ny iray amin’ireo filoha lefitra no misolo toerana vonjimika azy”, hoy kosa ny sekretera jeneralin’ny Antenimierampirenena, Randriamahafanjary Calvin, ny amin’ny fitantanan-draharaha eny an-toerana. Ny zokiolona amin’ireo filoha lefitra izany, araka ny And. 17 amin’ny fitsipika anatiny. Rehefa fantatra izay filoha vonjimaika izay, izy no mampiantso ny fivorian’ny birao maharitra. Tsy manana fahefana feno ny mpisolo toerana vonjimaika, fa ny fampandehanan-draharaha andavanandro no azony atao.
R. Nd.
French