Nambaran’ny Tanora miandrandra ny ho avy (TMH), Avaradrano tapany A tarihin-dRamanantenasoa Davidanirina Onjaniaina fa hanohana ny kandidàn’ny Irmar, Radafy Thierry na i Bota izy ireo amin’ny fifidianana depiote, ny 29 mey izao. “Nanohana tsy nisy fepetra ny filoha Rajoelina Andry isika nandritra ny fifidianana filohan’ny Repoblika farany teo. Fanohizana ny tolona efa napetraka sy ny ezaka rehetra efa notanterahina izao hirosoana izao indray”, hoy ireo mpitarika ny fikambanana. Nanterin’ireto tanora ireto fa zava-dehibe eo amin’ny fiainam-pirenena ny fananana maro anisa eny amin’ ny Antenimierampirenena. Hametrahana fahamarinan-toerana sy fitoniana ka vonona izy ireo ny hanohana ireo kandidà solombavambahoaka, atolotry ny vovonana Irmar. Anisan’ izany ity kandidà laharana voalohany anaty biletà tokana ho an’ny distrikan’Avaradrano ity.
Tsiahivina fa efa namondron-kery tahaka izao koa ny TMH Avaradrano B ka nahavory mpikatroka maherin’ny 1 200. Nohavaozina tamin’ izany ny mpikambana eo anivon’ny birao ary efa samy naneho fahavononana ny hanohana ny kandidà Bota sady ben’ny Tanànan’Ambohimangakely izy ireo.
Synèse R.