Mety tsy hitovy amin’ny teo aloha. Samy manana ny fomba hitondrany ny fampielezan-keviny ireo kandidà solombavambahoaka. Efa samy maka bahana amin’ny hiatrehana izany ireo etamazaoro politika isan-tokony.
“Mavesatra loatra ilay anto-bola nirotsahana hofidina ka tsy mitovy amin’ny fanao mahazatra ny hiatrehana izany”, hoy ny kandidà iray. Nanamafy izany ny kandidà tsy miankina, Ratsimbazafy Alain, eny Atsimondrano. Nambarany fa hiova kely tsy tahaka ny niatrehany ny tamin’ny nirotsahany teo aloha ny propagandy amin’ity. “Tsy maintsy hitety trano, araka izay vita mihitsy, mba hampihenana ny fandaniana. Fomba mahomby kokoa io satria manakaiky vahoaka”, hoy izy. Na izany aza, tsy maintsy eo hatrany ny famoriam-bahoaka amin’ireo toerana sasany, araka ny nambarany.
Ho an’ny kandidà hafa kosa, anisan’ny fomba fiady ny fitadiavana fanohanana amin’ireo mpiara-miombon’ antoka na koa ireo resy lahatra amin’ny foto-keviny ka manolotra vola na fitaovana. “Tena manampy izy ireo saingy voafetra ihany izany ka ezahina araka ny azo atao ny fandrindrana ny hoenti-manana”, hoy ny kandidà iray. Ny hevitra anefa no tena hovoizina sy entina eny an-kianja, araka ny nambarany.
Fizarana koveta sy PPN…
Efa mahazatra kosa ny an’ny kandidàn’ny eo anivon’ny fitondrana. Eo ny fizarana koveta na kojakoja ilaina amin’ny fiainana andavanandro (PPN). Efa anaty fandaharam-potoana ho an’ny sasany koa ny fiantsoana mpanakanto malaza, afahana mamory vahoaka.
Ankoatra izany, nahavita nitety ireo kaominina 16 mandrafitra ny distrikan’Avaradrano ny kandidàn’ny Kolekitifa. Nanaovana tombana izany ary efa maka bahana sy nametraka paikady amin’ny hiatrehana ny propagandy, manomboka rahampitso izy ireo.
Synèse R.
French