Notohizan’ny tomponandraikitry ny Base Toliara ny fanazavana sy ny fifanakalozan-kevitra mahakasika ny tetikasa, tany amin’ny fokontany enina (Ankilimalinike, Tsianisiha, Antapoake, Ranobe, Tsiafanoky, Beravy Ambony), ao anatin’ny kaominina Ankilimalinike sy Tsianisiha. nohazavain-dResambany André, tale lefitry ny fifandraisana Base Toliara, ny lafiny ara-teknika, ny ambanin’ny tany, ny ara-tontolo iainana, sosialy sy toekarena, sns. Eo koa ny tombontsoa aterany mba hitondra fampandrosoana. Nanotrona azy ireo ny solontenam-panjakana sy ny sampandraharaha teknika isan-tsokajiny (fahasalamana, tontolo iainana, fambolena, fananantany, harena ambanin’ny tany), mba hisian’ ny mangarahara ka tsy hampiahiahy ny vahoaka. Notsipihin’ny sekretera jeneralin’ny faritra Atsimo Andrefana, Mosa Romain, fa mandritra ny 14 volana ny fanomanana ary hampahomby azy ny fanohanan’ny mponina.
Nilaza i Ferdinand, olobe sady tompon-tany any Tsiafanoky, fa « tianay ny hisitrahana ny tombontsoa aterak’ity tetikasa ity, toy ny azon’ny mponina any Taolganaro amin’ny QMM. Tsy tianay hitarika posy bisikileta intsony ny zanakay». «Nahafapo ny fanazavana ary ho zarainay amin’ ny hafa. Mazava ny fanonerana ara-bola ny tompon-tany », hoy i Remosa avy any Tsianisiha II. Ho an’i Delicia, filohan’ny fikambanam-behivavy Tsianisiha, « tsy andrinay ny hanombohana ny fitrandrahana. Fanirianay eto Beravy Ambony ny hisian’ny Asa Tanamaro, sy ny hanohizana ny fanofanana ara-kasa sy ny asa sosialy ».
Njaka A.
French