Rallye des Industries: Tanora miantsehatra hampandroso ny indostria

Hanandratra ny fahaiza-manaon’ny tanora sy hampahafantatra ny vokatry ny indostria malagasy ny « Rallye des industries ». Kendrena ny hampivelatra ny traikefa sy hamolavolana toe-tsaina tia mandraharaha hanatsarana ny famokarana sy ny orinasa, indrindra hitiavan’ny daholobe ny vokatry ny indostria malagasy.

Nanomboka amin’ny fom­ba ofisialy omaly, tetsy amin’ny Audito­rium Havoaria Anosy, ny «Ral­­lye des industries» an­diany voalohany, karakarain’ ny Sendikan’ny indostria eto Madagasikara (SIM). «Tanjo­na ny hampifandraisana ny ta­nora sy ny indostria mba ha­­hatsapany ny fandraharahana ao anatin’ny tontolo», hoy ny filohan’ny SIM, Rasami­mana­na Tiana. No­tsindriany manokana fa «fo­toana iray ahafahan’ny tanora mampihatra ny fahalalana norantoviny ny fifaninanana atao». Misy dingana enina ny fizotry ny fifanintsanana izay haharitra iray vo­lana ka ha­hafahan’ireo mpianatra avy amin’ny Oniversite 10 maneho ny fahalalana amin’ny ankapoben’ny indostria ma­lagasy sy ny vokatra ataony. Andrasana amin’ireo mpi­anatra ny fandrafetana Busi­ness plan sy paikady ho fampandrosoana ny orinasa, sns. Hanome torolalana sa­mihafa sy tantsoroko kosa ny filankevitra siantifika ary ha­nohana ireo tanora ny orinasa mpiahy ny tsirairay ka hi­ainan’izy ireo sahady ny fi­ainana eo anivon’ny orinasa.

Fanamby
«Tombony ho an’i Mada­gasikara ny fanànana tanora ho fanoitra ho an’ny fampandrosoana sy hampiroborobo ny toekarena», raha ny lahatenin’ny minisitry ny Tanora sy ny fanatanjahantena, Abdulah Marson Mousta­pha. Mila omen-danja sy tohanana, hoy izy, ny tanora hahafahantsika mandroso sy manana hoavy mamiratra. Toe-tsaina hitondrana ny « Rallye des industries » ny hampiroboroboana ny fahaiza-manao sy hanakaikezana ny toekarena. Hamantaran’ ny Malagasy sy hitiavan’ny rehetra ihany koa ny vokatry ny indostria eto an-toerana. Araka izany, hofanina hahita ny eny anivon’ny indostria ireo tanora hahazo traikefa ka hampiharana izany ao anatin’ny tontolon’ny famo­karana indostrialy. Ho masoivohon’ny indostria eny ani­von’ny fiarahamonina ihany koa izy ireo ka hizara ho an’ ny rehetra ny tombontsoa sy ny hatsaran’ny vokatra ma­lagasy.

Henintsoa