Tena ilain’ny mpizahatany ny mahafantatra ny toerana tsidihiny. Manamora ny diany ny boky soridia, toy ny fahita any ivelany.
Nahavita dingana lehibe ny Ofisim-paritry ny fizahantany Analamanga (Ortana), amin’izao 15 taona niorenany izao. Nampahafantarina omaly ny fivoahan’ny boky soridia, ahitana 128 pejy. Mirakitra ny toerana manan-danja tsara tsidihina eto amin’ ny faritra Analamanga. Natao ho an’ny rehetra toy ireo mpankafy miara-dia hitety vohitra an-tongotra, na amin’ny bisikileta, na koa mitaingina sovaly. Marihina fa efa mikarakara hetsika miara-dia an-taona maro ny Ortana, ilay antsoina hoe « tsidi-bohitra ». Nahatratra 10 000 ny mpizahatany eto an-toerana nanao dia an-tongotra, nitety vohitra maro manan-tantara teto Analamanga, iarahana amin’ny mpitaridia matihanina ao amin’ny Ortana. Natao entina hampiroboroboana ny fizahantany anatiny manodidina an’Antananarivo Renivohitra.
Miisa 49 ny soridia azo andehanana an-tongotra, hita ao anatin’ity boky ity. Mahakasika kaominina ambanivohitra 27, fokontany 303, ao anatin’ny distrika 8 eto Analamanga. Tombanana ho maherin’ny 1,5 miliara Ar isan-taona ny fandaniam-bolan’ny mpizahatany.
Maherin’ny 1 000 km ny lalana azo aleha, ka efa ahitana famantarana manoro ny lalana ny 495 km. Karazany telo ny soridia azo isafidianana. Voalohany, fitetezana tendrombohitra « trek », mirefy 182 km misy dingana sivy. Faharoa, ny soridia mitsangatsangana, karazany 23. Fahatelo, soridia mahazatra misy karazany 14.
Matihanina
Nilaza ny minisitry ny Fizahantany sy ny asa tanana (MTA), Rtoa Viviane Dewa, omaly, fa « tsapa fa miditra amin’ny tena matihanina ny Ortana amin’izao ezaka vitany izao ». Ho an’ny tale mpanatanteraka (DE) ny Ortana, Razafinavalona Harimisa :
« fanamby manaraka ny hanitarana ny soridia any amin’ny faritra manodidina an’Analamanga. Efa natao ny taona 2024 ny mandeha bisikileta mankany Itasy. Eo am-pametrahana ny famantarana amin’ ity taona 2025 ity ».
Njaka Andriantefiarinesy
French