Niakatra ho 2 000 Ar ny kilao amin’ny katsaka noho ny fiovaovan’ny vidin-tsolika sy ny haratsian’ny lalana. Mahatratra 100 000 Ar kosa ny iray gony, raha 50 000 Ar izany teo aloha.
Nampakatra ny vidin’ ny katsaka amin’ny kilao ho 2 000 Ar ireo tsenakely ao Ambatolampy Tsimahafotsy, tamin’ity volana aogositra ity. 100 000 Ar kosa ny iray gony 50 kg, raha toa ka 50 000 Ar izany teo aloha ary 1 000ar ny kilao. Vokatra tena ilaina tokoa ny katsaka kanefa tsy mitsaha-miakatra ny vidiny. «1 700 Ar teo aloha ny katsaka tsotra ho an’ny akoho gasy, ary efa nisy fotoana tafakatra 2 200 Ar, ary 3 500 ar ny katsaka provandy. Lafo ho anay tokoa izany satria tsy mitsaha-miakatra ny vidiny kanefa dia tena ilainay amin’ny fiompiana ataonay. Mampanatody haingana sy mampangeza ny akoho gasy ompinay izy io. Maha be lanja kokoa ireo akoho fakana nofo izy ary mampihena ny tavy ao aminy », hoy ny fanamarinan-dRasolohanitriniaina Arline, mpiompy akoho.
Antony mampiaka-bidy ny katsaka
Miantraika any amin’ny saran’ny fitaterana ny katsaka ny fiakaran’ny vidin-tsolika. 800 ar ny fangalana azy any am-potony ary miakatra arakaraka ny fampitana sy fitanterana azy isan-tsokajiny izany. Eo ihany koa ny hamaroan’ny mpanangom-bokatra eny ifotony ka zary lasa vitsy ny vokatra tonga eny an-tsena.
Fiantraikan’ny fisondrotam-bidy
Voatery mampakatra ny vidin’ny vokatra (hena, atody, sns) ireo mpiompy, na mampihena ny vokatra sy ny isan’ny biby mba hitazomana ny tombombarotra. Miteraka fahaverezan’ny fahefa-mividin’ny tokantrano sy izay miankina amin’ny katsaka izany. Voatery izy ireo mihinana sakafokely kokoa na mitodika any amin’ny vokatra mora sy ambany kalitao. Mitarika azy ireo ho any amin’ny tsy fanjarian-tsakafo sy ny maro hafa anefa izany.
Ninah (mpianatr’asa)
French