GEF6-AMP : Faritra arovana an-dranomasina vaovao 3 mitotaly 1,5 tapitrisa ha

Mitombo hatrany ny Faritra arovana an-dranomasina (AMP) arovana sy tantanina eto Madagasikara. Ho tratra tsy ho ela ny tanjona 2,4 tapitrisa ha natao fanamby tany Sydney.

Dingana lehibe! Natao sonia, omaly, ny fifanarahana ho fanitarana sy fananganana Faritra an-dranomasina (AMP) eto Madaga­si­kara, mitotaly 1,5 tapitrisa he­kitara, ao anatin’ny tetikasa GEF6-AMP. Famatsiam-bola avy amin’ny Tahirimbola ho an’ ny tontolo iainana maneran-tany (GEF) amin’ny alalan’ny World Wildlife Fund (WWF). Nambaran’ny minisitry ny Ton­to­lo iainana sy ny fampandrosoana maharitra (Medd), Ando­nirina Max Fontaine, omaly, fa tsy ho ela dia ho tratra ny tanjona araka ny fanambarana tany Sydney Aostralia, hampitomboana avo telo heny ny AMP eto amintsika. Satria, efa nisy 200 000 ha, ny AMP Sorkay any Sainte Marie, vao napetraka ny volana jona teo, ary miampy ireto 3 hafa ireto. Tanjona lehibe ny hitsinjovana ny fari-piainan’ny mponina.
Fifanarahana telo tonta, teo amin’ny tetikasa GEF6-AMP, ny Tahirimbola ho an’ny Faritra arovana eto Madagasi­kara (FAPBM) izay nandrindra ny antontan-taratasy, ary mi­tantana azy ny Wildlife Con­servation Society (WCS).

Hazandrano mampinono

Miisa telo ny AMP vaovao natsangana voakasiky ny fifanarahana. Voalohany, ny AMP Atimo Vata’e, mirefy 772 199 ha, any amin’ny faritra Androy. Toerana manan-danja amin’ny fisian’ny hazandranomasina mampinono (IMMA) sady manan-danja amin’ny karazan-javamananaina (ZCB). Satria faritra fitomboan’ny ta­ranaka trozona misy trafony. Faharoa, ny AMP Helodranon’ Antongil, mirefy 431 388 ha, any amin’ny faritra Ambato­soa, eo anelanelan’i Sava sy Analanjirofo. Manana hazandranomasina mampinono ihany koa, ahitana vatohara sy ala honko, sady fitobian’ny trozona misy vozona. Faha­telo, ny AMP Tandavandria (Corridor) Nosy Be, mirefy 329 700 ha. Faritra manan-danja ho an’ny karazan-javamananaina an-dranomasina ity toerana ity, ahitana antsan­tsa trozona (requins-baleines) sy feso misy vozona. So­kajin’ ny IUCN ho isan’ny Fa­ritra manan-danja ho an’ny an­tsantsa (requins et raies) ihany koa.

Njaka Andriantefiarinesy