Manohana ny tetikasa volavolain’ny tanora ny orinasa QMM any Taolagnaro. Nivoaka ny andiany voalohany hisitraka ny fandaharanasa Lombao.
Miara-miasa amin’ny Miarakap ny orinasa QMM amin’ny fandraisana anjara amin’ny fampandrosoana ny mpiara-monina (RSE). Mpandraharaha miisa 25, vehivavy ny 14 ary lehilahy 11 no hisitraka ny fandaharanasa Lombao. Tanora 18 hatramin’ny 35 taona izy ireo. Voafidy ny tetikasan’izy ireo, noho ny fanavaozana entiny amin’ny sehatry ny fambolena, ny fiompiana, ny jono, ny asa tanana, ny indostrian’ny fambolena, ny fambolen-kazo, ny fitantanam-bola sy ny niomerika ary ny fahasalamana. Natao ny volana jolay teo ny fifaninanana hisitrahana ny fandaharanasa Lombao, tohanan’ny QMM. Miisa 39 ny kandidà nifaninana, ahitana tetikasa 35 sy orinasa vao misandratra 4 avy any amin’ny kaominina Taolagnaro, Ampasy Nahampoana ary Mandromondrotra, ka ny 25 no voafidy naharesy lahatra ny mpitsara.
Nizara telo ny dingana narahina. Ny famelabelarana fohy, ny fanazavana ny drafitry ny tetikasany avy ary ny famahana ny olana mahakasika ny etika. Miisa 10 ny mpitsara, avy amin’ny manam-pahefana ao an-toerana, ny sampandrahara teknika sy ireo mpiara-miombon’antoka. Tao anatin’ny mangarahara tanteraka sy ny fanajana ny fitoviana lenta ny fitsarana ny mpiadina.
Fampiofanana sy famatsiam-bola
Nataon’ny QMM sy ny Miarakap ity fifaninanana fandaharanasa Lombao ity. Satria, sarotra ho an’ny tanora ny fikarohana famatsiam-bola ho an’ny tetikasany amin’izao fotoana izao. Anisan’ny tohana omen’izy ireo ny fanofanana, ny fanoroana sy fanaraha-maso akaiky, ny fanampiana ara-teknika ary koa famatsiam-bola entina hanombohana ny tetikasa. Manamafy ny orinasa QMM amin’ny fanohanana ny fandraharahana sy ny famoronana asa. Manampy amin’ny fampiroboroboana ny toekarena ao amin’ ny faritra, sady mampihena ny fiankinan-doha amin’ ny asa fitrandrahana ataony.
Njaka Andriantefiarinesy
French