“Orange Summer Challenge 2025”: Laharana faharoa ny Startup GazNika

Misongadina eo amin’ny famoronana tetikasa ny Malagasy. Nasehon’ny ekipa Startup GazNika ny fahaizany tamin’ ny “Orange Summer Challenge”.

Namiratra indray i Mada­gasikara nandritra ny fifaninanana iraisam-pirenena, « Grand prix international Orange Summer Challenge (OSC) 2025 ». Nifantoka tamin’ny lohahevitra « Startup for Good », miompana amin’ny famoronana tetikasa mitondra soa. Nahazo ny laharana faharoa tamin’izany ny Startup GazNika. Hetsika natao tany Casablanca, Ma­roc ary narahana mivantana tao amin’ny Orange Digital Center (ODC) Soarano.
“Rehareha ho anay ny nitondrana an’i GazNika teo amin’ny sehatra iraisam-pirenena. Mandrisika anay handroso hatrany sy hitondra zava-baovao ho an’ny Mala­gasy ny fahazoana izao loka izao. Isaorana manokana ny Orange Digital Center tamin’ ny fanohanana nataony”, hoy ny mpamorona ny tetikasa, Zoniaina Natacha. Araka iza­ny, nahazo fanohanana mano­kana sy famatsiam-bola mi­tentina 16 000 € ny tetikasa ka ny 11 000 € natokana ho an’ ny fampiroboroboana ny tetikasa raha ho an’ireo tanora manan-talenta kosa ny 5 000 €.

Afrika
Hetsika karakarain’ny ODC amina firenena 14 aty Afrika ny “Orange Summer Chal­lenge”, izay hanandratana ny fandraharahana maharitra sy ny tetikasan’ny tanora. Na­nohana ny andiany 2025 ny Amazon Web Services, ny Meta, ny Pnud, ny Dar Blo­ck­chain ary ny The Hash­graph Association. Roa taona nisesy izao, nisandratra teo amin’ny sehatra iraisam-pirenena ha­trany i Madagasikara tamin’ny fifaninanana. Ny taona 2024, tamin’ny alalan’ny Plastikoo, ary nanamafy izany indray izao ny GazNika. “Rehareha lehibe ho an’i Madagasikara izao fahombiazana izao. Hita soritra maneran-tany ny talentan’ny tanora malagasy”, hoy ny talen’ny RSE, ODC sy Mé­cénat avy ao amin’ny Orange Madagascar, Andria­nalison Lalaina.

Henintsoa